دمشق میں باغیوں کی آمد پر دارالحکومت میں اس وقت کیا ماحول ہے؟

BBC KASHMIRدمشق میں باغیوں کی آمد پر دارالحکومت میں اس وقت کیا ماحول ہے؟

,

بشارالاسد کے ملک چھوڑ جانے کی اطلاعات کے بعد شام میں اسد خاندان کے 50 برس کے اقتدار کا خاتمہ ہو گیا ہے۔ اتوار کو جب شامی باغی دمشق میں داخل ہوئے تو اس وقت سرکاری فوج نے یا تو پسپائی اختیار کی یا پھر وہ ان باغیوں کے ساتھ مل گئی۔

باغیوں کی آمد کے بعد دمشق میں اس وقت مرکزی اموی سکوائر پر جشن منایا جا رہا ہے۔ اموی سکوائر وہ جگہ ہے جہاں سے سرکاری ٹی وی اپنی نشریات کرتا ہے۔

شام میں اسد خاندان کے 50 سالہ دور کا ’ایک ہفتے میں خاتمہ‘: آگے کیا ہوگا؟

جشن کے طور پر اس وقت ہوائی فائرنگ بھی کی جا رہی ہے۔ ایسی بھی اطلاعات ہیں کہ صدارتی محل میں لوٹ مار بھی کی جا رہی ہے۔

دمشق کی سڑکوں پر جشن منایا جا رہا ہے اور باغی شام کی آزادی کے جھنڈے لہرا کر اپنی فتح پر بہت خوشی منا رہے ہیں۔

عام شہری گاڑیاں لے کر سڑکوں پر نکل آئے، جس سے امن کا تاثر ملتا ہے۔ کچھ لوگوں کا یہ کہنا ہے کہ اب زندگی کتنی خوشگوار ہو جاؤ گی۔ ان مظاہرین میں سے کچھ چلا رہے ہیں اور کچھ ہنس رہے ہیں۔

ہم نے ایرانی سفارتخانے کے باہر دو نوجوانوں سے بات کی ہے۔ ان کا کہنا تھا کہ وہ بہت خوش ہیں۔ ان کا کہنا تھا کہ بشارالاسد کے دور میں زندگی بہت اجیرن تھی اور وہ خود کو محفوظ محسوس نہیں کر رہے تھے۔ مگر اب بہتری آنے کے امکانات ہیں۔